陰風/陣雨/冇太陽
呢個先係荷蘭正常夏天？
筆者喺荷蘭都住左好幾年，雖然荷蘭出咗名天氣差，但係往年夏天都會有段時間陽光普照，間唔中都會有啲日子氣溫去到二三十度。
不過，今年夏天非常唔同。經常打風落雨，有陽光嘅日子真係寥寥可數。但係荷蘭嘅同事就同筆者講，原來咁先係荷蘭真正嘅夏天！
根據荷蘭媒體報道，原來荷蘭正常夏天最高氣溫只有22度。今年七月，荷蘭24小時平均氣溫只有18度（比歷史平均18.3度低少少）。相比起過去三年的確係涼咗好多；與其話今年比較凍，不如話過去三年「比正常熱」（過去幾年平均氣溫有大約25度）。
難怪荷蘭人暑假一定會「南下」去其他歐洲國家享受陽光。一般而言，荷蘭人首選會係法國南部、意大利、西班牙、葡萄牙等等。今年因為疫情關係，唔少荷蘭人選擇自駕遊，避免坐飛機。最近，由荷蘭到法國嘅公路上，更有長達1000公里嘅車龍添！名副其實嘅車水馬龍啊！
由於好多荷蘭人都會喺夏天嘅時候一次過放幾星期大假，唔少公司去到呢一段日子運作都會特別慢。筆者啱啱嚟荷蘭嘅時候都覺得好新奇，過多一排就習慣嚕。
如果俾你揀，夏天可以放幾個星期都冇問題，你又想去邊度玩呢？
又：最近世界各地都有天氣反常嘅案例，包括希臘同土耳其嘅大火，荷蘭南部、德國同比利時由暴雨引致嘅水浸。希望大家都可以多啲關注氣候變遷導致嘅環境問題，好好檢視一下平日嘅生活習慣，盡可能減低自身嘅碳排放量。否則，分分鐘連成個荷蘭都會浸晒落水底😭😭
Search